Syria-a beihpui thlaknaah civil mi 23 an thi tawh

Syria khawpui, Damascus bula helho thunun bialah Pathianni khan sipaiten beihpui an thlak a, civil mi 23 an thi niin activist-ten an sawi.

Syria sipaite hian helpawlte thunun bial chhungah beihpui an la thlak chhunzawm reng a, Pathianni khan Eastern Ghouta district chu thlawhtheihna hmangin an bei leh a ni. Syrian Observatory for Human Rights chuan sipaite beihpui thlaknaah hian civil mi hliam tuar eng emaw zat an awm a, thi zat pawh hi an la punchhoh a rinawm thu a sawi. Thi zingah hian naupang pali an tel niin a tarlang bawk.

Syrian Observatory chuan kar hnih kalta chhung khan Eastern Ghouta-ah hian beihpui thlak a nih vangin mi 100 chuang an thi tawh tih a sawi. Eastern Ghouta hi Damascus bula awm niin, mi nuai thum vel an cheng a ni.

Pathianni vek khan Russia chuan Euphrates lui chhak lama al-Shafah khua a bei bawk. Russia Defence ministry chuan Tu-22M3 long-range bomber hmangin Islamic State (IS) firfiakte hmun kah a nih thu a sawi.

Kum 2011 March thla aṭang khan Syria President Bashar al-Assad-a kaihhruai sorkar leh helte an inbei a, tualchhung indona thleng vang hian mi sang tel an thi tawh a, mi maktaduai tel chu ram pawnah himna zawngin an tlanchhe bawk. Russia hi President Assad-a kaihhruai sorkar thlawptu niin, Syria sorkar puiin kum 2015 September thla aṭang khan Syria hel lakah hian beihpui a thlak a ni. Hetihlai hian US, Turkey leh Gulf ramte chuan eptu lam an thlawp thung.