Pope Francis-an Myanmar a thleng

Roman Catholic kohhran hotu, Pope Francis chuan ni thum cham turin Thawhṭanni khan Myanmar a thleng. Pope hian Myanmar a tlawh zawhah Bangladesh a pan leh dawn a ni.

Pope Francis leh Myanmar sipai hotu, Senior General Min Aung Hlaing chu Thawhṭanni khan inkawmin, ram hruaitute mawhphurhna pawimawh dante an sawidun a ni. Sipai hotu hian Myanmar ramah sakhaw thleibik a awm loh thu te, sakhaw tinten zalenna an neih thute a hrilh a, sipaite chuan ram muanawm leh boruak ngelnghet siam tuma an beih thu a hrilh bawk. Pope leh sipai hotu hian thilpekte pawh an inpetawn a ni.

Nimin khan Pope hi State Counselor Aung Suu Kyi nen an inkawm a, kohhran hruaitute a kawm bawk.

Myanmar ram hi Buddist ram niin, a ram mipui maktaduai 51 chuang awm zingah Roman Catholic chu nuai sarih vel chauh an awm a ni. Pope hian vawiin-ah Ragoon khawpuiah mass a buatsaih dawn a, he huna tel tur hian ram chhung hmun hrang hrang aṭangin mi 150,000 an inziaklut tawh a ni.

Tun hnaiah Myanmar sipaite chu Rohingya Muslim-te laka beihpui an thlak danah sawisel an tawk nasa hle a, Suu Kyi-i pawh Rohingya te thlavang hauh zawnga a ṭawng loh avangin dem a hlawh phah hle. Sipaite chuan Rohingya helpawl, security force beitute chauh an bitum niin an sawi a, mahse ram dangte chuan Rohingya hnam thenfai tumna niin an puh a ni.

Rohingya chungchang avanga Myanmar-in buaina a tawh mek lai a nih avangin Pope-in Myanmar a tlawh dawn pawh hian a ṭawngkam hmanah fimkhur turin Myanmar-a Catholic kohhran chuan a ngen. Myanmar sorkarin Rohingya hnam chu khua leh tui anga a pawm loh avang te, Bengal mi tia a sawi avangin Pope pawh hi Rohingya tih ṭawngkam hmang lo turin an hrilh lawk a ni.

Hetih lai hian sipaite beihpui thlak vanga Bangladesh-a Rohingya mi tlanchhia hi mi 624,000 an tling tawh niin UN Office for the Coordination of Humanitarian Affairs chuan a sawi. UN in a tarlan danin kar kalta chhung khan Bangladesh-ah hian raltlan hi nitin mi 430 vel thlen belh zel ang an ni.