China-in kum nga tang turin Taiwan activist hrem

China court chuan Taiwan activist, Lee Ming-Che chu China sorkar thuneihna paihthlak tuma thiltiah puhin, kum nga chhung jail tang turin a hrem.

Lee Ming-che hi group messaging chat-ah multi-party democracy chawilar zawnga thu thehdarhah puhin thubuai siamsak a ni a, a thubuai hi September thla khan ngaihtuah a ni.

Lee hremna pek hi Taiwan chuan a dem hle a, Taiwan president office pawhin sawiselin, Chinese court thutlukna siam dan chu an pawm theih loh thu a sawi. Taiwan president Tsai Ing-wen chuan Lee chu chhuah tura a phut thu a sawi.

Lee Ming-che hi March thla khan China rama a zin chu a chin hriat lohin a bo a, a hnuah China thuneitute chuan sorkar paihthlak tuma rinhlelh thilah man a nih thu an sawi a ni. September thla khan Hunan province-a Yueyang People’s Intermediate Court-ah hruai a nia , China mi ṭhenkhat thawhpui a, social media lamah China sorkar beihna leh western-style democracy chawilar tumna thuziakte thehdarhah puh a ni.