Jerusalem-a bomb puakah mi 1 thi, hliam 14 an awm

Israel official-te chuan nimin khan Jerusalem khawpui hmun hnihah bomb a puak a, mi pakhat a thih bakah hliam tuar mi 14 an awm tih an sawi.

Israel police-te chuan nimin zinga khawpui chhunga pawikhawihna thleng chu Palestinian-te tih niin an ringhlel.

Bomb pahnih hi khawpui daia bus stop-ah ve ve tih puah a ni. A hmasa zawk hi mipui tam lai, khawpui luhna tur bula bus station-ah tihpuah a ni a, minute 30 hnu velah khawpui khawchhak lama bus stop-ah bomb pakhat hi tihpuah a ni ve leh bawk.

Israel sipaite chuan bomb-te hi bag-ah an thukru nia sawiin, pawi nasa zawk a thlen theihna turin an bomb dahna bag-ah hian perek-te dah tel a ni, an ti. Israel ambulance service chuan bomb puak hmasa zawkah hian hliam mi 12 awmin damdawi-ah an hruai a, a hnuhnung zawkah hian hliam pathum an awm bawk tih a sawi. Hliam tuar zinga pakhat chu damdawi-in thlenpui hnuah a hliam tuar loin a thi a ni.

Gaza Strip-a rorellai, Pales­tinian pawl Hamas thupuangtu, Abdel-Latif Al-Qanoua chuan Jerusalem beih a ni chu a fak thu a sawi a, mahse an pawl tih a nih thu erawh a sawilang lo. Jerusalem-a pawikhawihna thleng chu Israel-in an ram luahsak leh an chenchilh zui avanga an pawikhawihna nen inzawmah a puhsak.

Heti hian Israel prime minister hlui Benjamin Netanyahu chuan right-wing sorkar thar siam turin an thurualpui party dangte inbiakna a neihpui mek.

An thawhpui zinga pakhat, ultra-natio­nalist party Jewish Power party hruaitu, Itamar Ben-Givr chuan bomb hmasa zawk puahna hmun hi tlawhin, pawi­khawihtute chungah na taka hremna lekkawh a phut thu a sawi. Ben Gvir chuan, "West Bank-a mi an nih pawhin, thang an kam ru em tihte, in tinah silai an kawl em tih dap rawh u. Kan thuneihna hi kan lantir thar leh a ngai a ni," a ti. Ben-Gvir hian sorkar tharah hian police minister-ah awm a inbeisei a ni.

Thawhlehni khan Israel mi, high school zirlai, car accident avanga West Bank-a Jenin khuaa Palestinian hospital-a enkawl chu a boral a, a ruang hi Palestinian helte chuan an rubo nghal a ni. Israel sipaite chuan mitthi ruang hi pe kir thuai turin an ti.