US Walmart dawra inkahna thlengah Mi 6 thi, pawikhawihtu kaphlum

Virginia, US-a Chesa­peake-a Walmart dawrah an ram huna Thawhlehni tlailam khan silai keng mi pakhat chuan dawr chhunga awmte a pawng kah a, mi 6 an thi a, mi dang ṭhahnem takin hliam an tuar.

Chesapeake-a inkahna hi America mipuiin Thanksgiving holiday an hman zawh hnua thleng a ni a , hemi hma Inrinni liam ta khan Colorado Springs-a LGBTQ club-a inpawng kahna thleng bawkin mi panga kahhlum an ni a, mi dang 18 in hliam an tuar bawk. Pawikhawihtu hi ngawrh taka chhuizui mek a ni. Thuneitute chuan an rinhlelh man, kum 22 mi Anderson Lee Aldrich chuan Transgender Day of Remembrance puala hun an hman laiin long rifle hmangin kalkhawmte hi a pawng kah ta chiam tih an sawi.

Thawhlehni tlaia pawi­khawihna thlengah, Chesapeake Police Depart­ment officer Leo Kosinsk chuan response officer leh tactical team-te chuan rang taka pawikhawihna hmun an thlen nghal thu sawiin, silai kengtu hi kahhlum a nih thu a sawi bawk. A chanchin kimchang hi police lam chuan an la puangzar lo.

United States-a retailer lian ber Walmart chuan thuchhuah siam nghalin, "He thil thleng hian min ṭhawng hle. Pawikhawihna tuartu kan khawtlang mi te leh kan hnathawkte kan tawrhpui takzet a, dan keng­kawhtu lam pawh ṭha takin kan thlawp zel ang," a ti.

United States-ah hian silai hmanga tharum­thawhna thleng hi a hluar chho hle a, kuminah ringawt pawh silaia inpawng kahna vawi 600 a thleng tawh tih Gun Violence Archive website chuan a tarlang.