Brazil President hlui Bolsonaro-a'n inthlan result complaint

Brazil ram President thlanna neih taka chak zo ta lo, president Jair Bolsanro chuan inthlan result chungchangah complaint thehlutin, vote thlakna khawl ṭhenkhat chu a rintlak loh a ni, a ti.

Superior Electoral Court (TSE) chuan President thar thlanah chak zawka Luiz Inacio Lula da Silva puan a nihna chu a pawm tawh avang leh, Brazil rama politician langsar ho leh ram dang an thawhpuite pawhin Lula chak an pawm tawh avangin, Bolsonaro complaint thehluh hian awmzia a neih thui vak a rinawm lo. Mahse Bolsanaro thlawptuten boruak ṭha lo zawk siamin, nawrhte an huaihawt chhoh a hlauhthawnawm thung.

TSE kaihruai mektu, Supreme Court justice Alexandre de Moraes chuan Bolsonaro hian complaint a thehluhah hian October thlaa President thlanna thawh hniha neiha vote tlak dan chu a thehluh tel a ngai tih sawiin, a thehluh tel loh chuan a complaing hi a hnawl tur thu a sawi.

Brazil President thlannaah hian an tihdan phungah chuan, result hriatchian anih theih veleh a chak lo zawkten an chak lo an pawm thu an sawi ṭhin. Mahse Bolsonaro hian a chak loh a pawm thu a la sawi lo a, result tihchhuah a nih hnuah pawh thawm engmah a nei zui lo. Mahse Thawhlehni khan result a complaint thu hi a sawi ta a ni.