NKorea-in ballistic missile enchhin leh

North Korea chuan nimin zing khan South Pyongan Province-a Pyongsong aṭangin ballistic missile a enchhin leh niin South Korea, Japan leh US official-ten an sawi.

South Korea sipaite chuan ballistice missile hi an ram huna zing dar 3.17 khan Pyongsong aṭangin kahchhuah a nih tih an sawi. Japan Defence Minister Itsunori Onodera chuan missile hi km 4,000 vela sanga a thlawh hnuah Japan tuipuiah a tla nia sawi a ni.

Nimin zinga NKorea missile enchhin hi Hwasong-15 missile nia sawi a ni a, missile a enchhin tawh zinga la chak ber nia ngaih a ni.

US Defence Secretary Jim Mattis pawhin nimina missile kahchhuah hi ṭum danga a kahchhuah tawh aiin a thlawk sang niin a sawi a, NKorea-in missile a siam zel chuan khawvel himna a tiderthawng a ni, a ti.

South Korea President Moon Jae-in chuan NKorea missile kahchhuah vang hian national security meeting a koh nghal rin a ni a, Japan Prime Minister Shinzo Abe pawhin UN security Council chu emergency meeting nei turin a ngen bawk.

NATO secretary-general Jens Stoltenberg chuan NKorea missile kahchhuah chu a dem thu a sawi a, hei hi UN Security Council Resolution palzutna lian tak a ni a, regional leh international security dinhmun tihderthawnna a nih thu a sawi.

UN Secretary General Antonio Guterres pawhin NKorea thiltih chu a dem thu sawiin, NKorea chu ramdangte nena an inkar boruak tichhe zawnga hma la chhunzawm tawh lo turin a ti. Thuchhuah siamin, Guterres chuan NKorea-in missile a enchhin leh chu Security Council resolution palzutna lian tak a nih thu a sawi.

Missile enchhin nia puh chungchangah hian NKorea chuan thuchhuah engmah a la nei lo thung.