Boko Haram dintu in museum-ah siam dawn

Nigeria-a Islam helpawl, Boko Haram dintu Mohammed Yusuf-a in chu museum-ah siam a ni dawn a, hei hian khualzin tam zawk a hip beisei a ni.

Mohammed Yusuf hian kum 2002 khan Boko Haram hi a din a, Islamic state siam tumin kum riat zet sorkar lakah an hel tawh a, an pawikhawihna an thlen vangin mi 20,000 vel an thi tawh a ni. Boro Haram hi Nigeria hmarchhak lam, Borno state-ah an che hluar ber a, he biala an pawl hmun, Sambisa ramhnuai ami pawh tourist centre-ah Borno state chuan siam a tum a ni.

Nigeria sorkar chuan Boko Haram hel nena an inbeihnaah sorkar chuan hnehna a chang tawh niin a sawi a, hei vang hian Borno state-a helho hmunte pawh khualzinte hipna atana siam danglam a tum a ni. Borno state commissioner for home affairs, Mohammed Bulama chuan Maiduguri-a Yusuf-a in chu museum-ah siamin, he hmunah hian Boko Haram kaihhnawih thil hrang hrangte dah a ni ang, a ti.