Australia-in Raqqa-a zin khapna a hlip

Australia chuan Syria-a Raqqa khawpuia an ram mi leh sate zin khapna thupek a siam chu a hlip.

Islamic State (IS) firfiak pawlten Syria security force-te kut aṭanga Raqqa khawpui la a, an thuhnuaia an dah hnuah Australia mite chu he khawpuia zin lo tur hian hriattir an ni a, a zin luite chu thubuai siamsak theih an nih thu a sawi. Mahse he khawpui hi Syria sipaiten la letin, firfiak kutah a awm tawh lo a, hei vang hian zin khapna thupek a siam pawh a hlip leh ta a ni.

Australia sorkar chuan Raqqa-a zin khapna thupek hi kum 2014 December thla khan a siam a, hei hi an ram mi leh saten firfiak pawl an zawm tur venna kawng khat atana a tih a ni. Hei bakah hian tualchhung indona thlenna rama awm, dual citizen neite chu an Australian passport tihtawpsakna tur dan a siam bawk.

Nimin zing khan Foreign Minister Julie Bishop-i chuan zin khapna thupek hlih a nih thu hi a puang a, IS kut aṭanga Raqqa khawpui laklet a ni chu firfiakte beihletna kawnga hmasawnna pawimawh tak a nih thu a sawi. Hemi rual hian Raqqa khawpui chu hmun him tak a la nih loh thu a sawi nghal bawk a ni.

Bishop-i chuan Raqqa aṭangin IS firfiakte umchhuah ni tawh mah se, firfiak pawl hi an la hlauhawm reng tih a sawi a, hmun dang dangah pawikhawihna thlen thei reng an nih thu a sawi.

Raqqa khawpui tlawh khapna hi hlip mah se, Australia chuan an ram mite chu Iraq hmarlama Mosul khawpui tlawh a la khap chhunzawm thung. Australia mi, he khawpui tlawhte chu thubuai siamsak zel an nih tur thu Australia Attorney General George Brandis chuan a sawi a, mi panga thubuai siamsak an nih tawh thu a tarlang bawk.