Pope leh Suu Kyi-i inkawm

Myanmar ram tlawha zin mek, Catholic Kohhran hotu Pope Francis leh Myanmar State Councellor Aung San Suu Kyi-te chu Yangon-ah an inkawm a, mahse an inkawmnaah hian tunlaia Myanmar ramin a buaipui mek Rohingya Muslim-te erawh a hminghmerhin an sawilang lo.

Meeting-ah hian Pope Francis chuan Myanmar sorkarin a ram chhunga hnam hrang hrangte nihna a zah leh ngaih pawimawh sak a ṭul thu a sawi a, Rohingya tih thumal erawh a hmang tel lo a ni. Myanmar sorkar hian Rohingya Muslim te hi khua leh tui anga a pawm loh avangin Myanmar-a Catholic kohhran hruaitute pawhin Pope hnenah a zin dawn hian Rohingya tih thu hi sawilang lo turin thurawn an lo pe tawh a ni.