Syria leh Iraq-ah US sipai awm tam
Pentagon report-in a tarlan danin, Syria leh Iraq-a US sipai awm zat chu official-a chhinchhiah aiin a let thum zetin an tam.
US defence department report chuan official-a chhinchhiah chuan Syria-ah hian US sipai 503 leh Iraq-ah 5,262 an awm mek nia tarlan a ni a, mahse Pentagon quarterly report-ah chuan Syria-ah hian sipai 1,720 leh Iraq-ah 8,892 an awm mek tih tarlan a ni.
US sipaite hi Islamic State (IS) firfiak bei tur leh, tualchhung sipaite training pe tura dah an ni.
US Defence Secretary Jim Mattis chuan kumin kumtir lam khan Iraq, Syria leh Afghanistan-a US sipai dah zat chu ennawn a nih tur thu a sawi a, mahse hemi ṭum hian Afghanistan-a US sipai awm zat chauh puanzar a ni. Pentagon thupuangtu Rob Manning chuan security thil avangin thil zawng zawng puanzar vek a rem lo ṭhin tih a sawi a, hemi rual hian a theih chinah chuan langtlang taka thil kalpui zel tum a ni, a ti.
US hian kum 2003 aṭang khan Iraq-ah hian sipai a tir lut a, sipai a tirhluh tam ber lai chu kum 2007 September thla kha niin, hemi ṭum hian Iraq-ah US sipai hi 168,8000 zet an awm a ni. Syria-a US sipai dahte hi a tam zawk chu a ram hmarlam, Kurdish bialah dahin, IS nena inbei mek Kurdish pawlte an pui a ni.