Russia-ah ni khatah hri kai thar 11,000 an awm Khawvel pumah hri kai maktaduai 4.1 chuang awm
Khawvela hripui leng mek, Covid-19 kai thar chu Pathianni khan mi 54,590 an awm a, an zinga mi 11,000 chu Russia rama mi an ni.
Khawvel pumah hri kai hi mi 41,52,870 an awm tawh a, mi 2,82,660 in he hri hi an thihpui tawh bawk.
Hri kai leh hri vanga thi tamna ber ram, US-ah chuan Pathianni khan mi 6,225 in kai tharin, Covid-19 kai hi mi 13,53,530 an tling tawh a ni. Spain-ah hri kai 2,64,660 awmin, UK-ah 2,19,180 leh Italy-ah 2,19,070 an awm.
Pakistan-ah dawr hawng ṭan
Hri leng vanga hun eng emaw chen dawrte khar a nih hnuah, Pakistan sorkar chuan nimin aṭanga khan dawr an hawng leh ṭan a, mahse kar khatah ni thum emaw ni li emaw bak hawn phal a ni lo ang.
Hri leng ziaawmna province-ah chuan nimin aṭang khan dawr hawn hi phalsak an ni. Pakistan-ah hian Covid-19 hri kai hi mi 30,941 an awm tawh a, an ram a retheih avangin he hri vanga an ram economy a tlakchhiat nasat loh nan, dawr hawn te hi sorkar chuan a phal ta a ni.
New Zealand-in inthlahdul chhoh zel tum
New Zealand chuan Covid-19 vanga khuahkhirhna sorkarin a hman mek chu thlahdul chhoh a ni dawn tih an ram prime minister Jacinda Ardern chuan a sawi.
May 18 aṭangin school hawn tum a ni a, May 21 aṭangin bar-te pawh hawn tum a ni. Restaurant, cafe, cinema leh shopping centre-te pawh hawn tum a ni a, mahse mipui hi 10 aia tam punkhawm khap rih a la ni ang. Ningani aṭangin ram chhungah inkalpawh phal a ni tawh dawn bawk.
New Zealand-ah hian hri kai hi mi 1,497 an awm a, heng zinga mi 1,386-te chu enkawl dam tawh niin, mi 21-in he hri hi an thihpui tawh bawk a ni.
UK-ah school lehdawr ṭhenkhat hawng dawn
United Kingdom prime minister Boris Johnson chuan June 1 aṭangin an ramah school leh dawr ṭhenkhatte hawn a nih dawn thu a sawi.
Europe ram zinga Covid-19 tuar nasa ber ram pathumna, UK hian inkharkhip puan a nih avangin sumdawnna leh zirna in khar leh social distancing chu khauh takin a kal pui a ni. Nimin aṭang khan Johnson chuan in lama hna thawk thei lo te chu an hna thawh phalsak a nih thu a sawi a, social distancing bawhchhe loin naktuk aṭangin exercise la duh tan lak phal a ni dawn tih a sawi bawk.
Johnson hian inthlahdulna ṭhenkhatte a sawi hnu hian, mipuite hnenah social distancing chu zawm hram hram turin a chah a, school leh dawr-te tana inkaihhruaina siam thar chu tihchhuah a nih thuai tur thu a sawi.