Information zep turin China-in a nawr lo tih WHO in a sawi
World Health Organisation (WHO) chuan coronavirus leng chung changah information te zep turin China-in a nawr nia media report-in a tarlan chu thu dik lo a ni tih a sawi
Germany chanchinbu pakhat, Der Spiegel chuan WHO hotu Tedros Adhanom Ghebreyesus leh China presidentt Xi Jinping-te January 21-a telephone-a an inbiak dan chungchang a chhuah a ni. President Xi hian he hri leng mek hi mihring leh mihringah inkaichhawn theih a nih thu chu zep rih tur leh, khawvel huapa hripui lenga puan a nih hun pawh titlai turin WHO hotu hi a hrilh niin an tarlang. An thuchhuah hi Germany foreign intelligence agency, BND aṭanga an hriat niin a tarlang bawk.
WHO chuan Germany chanchinbu report hi thu dik lo a ni tih sawiin, an sawi hunah hian Tedros leh Xi hi an inbe lo a, a ti. WHO leh khawvel pumin Covid-19 leng mek doa theihtawp a chhuah laiin, hetianga report dik tawk lo tihchhuah chuan an hmalakna a tibahlah thei a ni, a ti.
China hian coronavirus hi mihring leh mihringah inkaichhawn theih a ni tih January 20 khan a lo nemnghet tawh a ni tih WHO chuan a sawi. He thu a nemngheh aṭanga ni hnih hnuah WHO official-te pawhin Wuhan-a hri leng mek chu mihringin an inkaichhawng thei tih tih a lanna a awm a, mahse chiang zawk zirchian leh a ngai tih thuchhuah siamin an lo tarlang bawk a ni, a ti. WHO hian February 11 khan Covid-19 chu khawvela hripui lengah a puang a ni.
Hripui leng mek chung changah WHO hian sawisel a tawk fo a, sawiseltu langsar ber chu US president Donald Trump a ni. President Trump hian hri leng a do danah WHO thiltih dan hi sawiselin, China lam awnah leh an thunun theih niin a puh a, US-in WHO fund a pek pawh a lo tihtawp phah tawh a ni.
China-in ram dangte puhna pha
China pawhin US leh ram dang ṭhenkhatten hri leng chungchanga hriattur pawimawh leh, he hri hi Wuhan-a laboratory pakhat aṭanga chhuak nia an puhna chu a pha.
China foreign ministry chuan an puhna chhan letna article hi Inrinni zan khan an ministry website-ah dahin, Wuhan-ah hri kai hmuh an nih hmain America mi zingah kai an awm tawh nia media report ṭhenkhat pawh a awm thu an tarlang. US-in Wuhan Institute of Virology aṭanga hri rawn darh nia a puhna chungchangah, he hri hi mihring siam chawp a ni lo tih finfiahna tam tak a awm thu leh, he institute hi coronavirus thar siam theihna chi pawh a ni loh thu a tarlang a ni.
Hri leng chungchanga information pawh khawvel hnenah a hun takah a hriattir a ni, a ti.