Malaysia PM thar Anwar Ibrahim lalut

Malaysia lal, King Sultan Abdullah Sultan Ahmad Shah chuan an ram prime minister thar leh, PM 10-na atan Anwar Ibrahim chu ruatin, lakluh nghal a ni.

Inthlanpui neih zawh takah khan sorkarna siam thei tura seat neih ngai zat hmu pha an awm lo. Anwar-a kahhruai Pakatan Harapan (PH) ṭangrual pawl hi seat la hnem ber ni mah se anni pawhin majority nei tura ngai, seat 112 an nei pha lo. PH ṭangrual pawl hian seat 82 an la a ni. Prime minister hlui Muhyiddin Yassin kaihhruai Malay-Muslim Perikatan Nasional (PN) ṭangrual pawl chu seat la hnem ber dawttu niin, seat 73 an la ve bawk. Kum 1957 aṭanga an rama thuneihna changtu, Barisan Nasional ṭangrual pawl chuan seat 30 chauh lain, inthlanpui neih tawha an chet chhiat ber ṭum a ni.

King Sultan chuan Anwar leh Muhyiddin-te bakah, Parliament member atana thlan tharte a hmuh hnuah, nimin khan Anwar chuan member 222 awmna Parliament-ah thlawptu a ngah ber avangin prime minister thar atana ruat a nih thu a puang ta a ni. Kum 75 mi, Anwar hi nizan khan lal inah PM thar atan lakluh nghal a ni. Anwar hian Parliament-ah fiahna a paltlang theihna turin, member dang eng emaw zat chu a kaihhruai sorkar thlawp tura a hmin theih a ngai ang.

Prime Minister thar Anwar Ibrahim hian student activist anga a political career a ṭan hnuah, PM hlui Mahathir kaihhruai United Malays National Organisation (UMNO) a zawm a, kum 1993 khan Mahathir chuan deputy-ah a ruat. Mahathari thlaktu atana rin kai ber a nih chhoh laiin an inkar boruak a chhe chho a, kum 1998 khan Mahathir chuan Anwar hi a ban a ni. Anwar hi mahni anpui kawpa puh chungchangah thubuai siamsak a ni zui a, Muslim ram Malaysia-ah chuan mahni anpui kawp hi pawikhawihna lian taka ngaih a ni. He an puhna hi Anwar chuan phain, a political career tihtawp sak an tumna niin a sawi thung. A thubuaiah hian thiam loh chantirin jail-ah tantir a ni a, kum 2004 khan chhuah a ni. Mahni anpui kawp chungchangah bawk jail-ah tantir leh niin, kum 10 a tan hnuah kum 2018 khan chhuah a ni.