China-ah Covid-19 hri leng thar leh mek ; Ni khatah hri kai 30,000 chuang awm leh tawh
China ramah Covid-19 hri leng a hluar chho leh mek a, Nilaini ni khan hri kai thar mi 30,000 chuang an tling a, hei hi Covid-19 hri a len tirh aṭanga ni khata hri kai hmuh chhuah an tam ber ṭum a ni.
Nilaini khan ram pumah hri kai thar mi 31,527 an awm a, Thawhlehni khan mi 28,000 an chuang tawh bawk. Hri kai an pun thar leh vangin Zhengzhou khawpuiah chuan vawiin aṭangin lockdown puan a ni dawn. Beijing, Shanghai, Guangzhou leh Chongqing-ah pawh khuahkhirhna tihkhauh a ni bawk.
China ram hi Covid-19 hri leng laka invenna leh khuahkhirhna kalpui nasa ber zinga mi niin, mass testing leh lockdown-te a kalpui nasa hle. Hetichung hian province 31-ah hri kai thar hi a pung chho leh a ni.
President Xi Jinping chuan an rama kum upa zawkte an tam avangin, heng mite hi hri leng laka venhimna turin khuahkhirhna khauh tak siam a ngai tih a sawi.