
European Parliament-in firfiaka chetna thlawptu ramah Russia a puang
European Parliament chuan Nilaini khan Russia ram chu firfiaka chetna thlawptu ramah a puang. Russia sipaite chuan Ukraine civil mite beiin, energy infrastructure, hospital, school leh mipui tawmhimna hmunte beiin, international law a bawhchhe nasa hle a ni, an ti.
Parliament-in resolution a pass chu Ukraine president Volodymyr Zelenskyy chuan lawmawm a tih thu a sawi. US leh ram dangte pawh firfiak thlawptu ramah Russia chu puang ve turin a ngen nghal bawk. Ukraine leh ram dangte laka a chetdan avangin kawng hrang hrangin Russia ram chu thlauhthlak zel an ngai a ni, a ti.
US state department hian ram pali - Cuba, North Korea, Iran leh Syria ramte chu firfiak thlawptu ramah a lo puang tawh a ni. Congress-a chamber pahnihah Russia pawh puang ve tura nawr ni mah se, US secretary of state Antony Blinken chuan list-ah a la telh duh lo a ni.
European Union-a ram pali, Lithuania, Latvia, Estonia leh Poland ramte chuan a hranin Russia hi firfiak thawptu ramah an lo puang tawh bawk.