Israel : Likud leh Otzma Yehudit party ten inremna ziak

Israel rama ṭangrual sorkar thar siam turin Likud Party leh Otzma Yehudit party chuan nimin khan inremna an ziak.

Prime minister thar tur, Benjamin Netanyahu kaihhruai Likud Party leh Itamar Ben-Gvir-a party, Otzma Yehudit-ten inremna an siamah, sorkar tharah Ben Gvir hi ministry din thar, national security ministry a enkawl dawn a ni.

Ben Gvir chuan thuchhuah siamin, "Right-wing sorkar siam turin thutlukna pawimawh tak kan siam a ni," a ti. National security ministry bakah, Otzma Yehudit party hian Development of the Negev, Galilee and National Fortitude Ministry, heritage, economy ministry-a deputy minister, Knesset-a Public Security Committee chairman-te an chang tel bawk ang.

Otzma Yehudit party hotu, Ben Gvir hi Palestinian ram hran din dodaltu langsar tak zinga mi niin, Arab mite huatna leh LGBT dodalna thu a sawi avangin thiam loh chantir a lo ni tawh bawk. Lawyer niin Juda-te humhalh tlat duhtu, Israel tana rinawm lo, Arab mite Israel rama awmte hnawhchhuah a duh thute pawh a lo sawi tawh a ni.

Israel inthlanpuia Likud party kaihhruai ṭangrual pawl hian seat la hnem ber mah se, sorkar siam turin seat ngai zat a nei pha lo a, hei vang hian ṭangrual sorkar siam turin party dangte an be mek a ni. November 13 khan president Isaac Herzog chuan Netanyahu chu sorkar thar siam tur hian a sawm tawh a, ni 28 hun pek a ni. Hemi chhunga an tihfel hman lo a nih chuan ni 14 dang hun pek belh theih a ni bawk ang.