Russia Parliament-in LGBT sawimawi khapna dan pass

Russia Parliament chuan puitling zinga mahni anpui kawp sawimawi khapna leh, mahni anpui kawpte punkhawm chungchanga khuahkhirhna dan siam chu Ningani khan a pass.

He dan thar hnuaia hian mipui vantlang hmaah emaw, online, film, lehkhabu leh fakna hmanga anpui kawp chawisan leh tihlar tumte chu an ram pawisa, roubles 4,00,000 thleng chawitir theih an ni ang. Ram dang mi, he dan bawhchhiate pawh ni 15 chhung hren leh, Russia aṭanga hnawhchhuah theih an ni dawn bawk. Mahse he dan hi Parliament upper house leh president Vladimir Putin-ten an pawm ve leh phawt a ngai dawn a ni.

Russia hian naupangte hnena anpui kawp sawimawi khapna hi a lo nei tawh a, puitling zingah pawh khap a ni leh theihna turin dan hi a siam belh leh a ni. Dan an neihsa hmang hian thuneitute chuan an rama gay pride march neih pawh an khapsak bakah, gay rights activist-te pawh an man fo bawk a ni.

Human rights activist-te chuan Russia dan siam hi na takin an sawisel a, hetih lai hian Russian Orthodox church hotu Patriarch Kirill chuan dan thar hi a thlawp thu a sawi thung.