China-ah Covid khuahkhirhna siam duh loin nawrh huaihawt

China sorkarin Covid-19 hri leng vanga khuahkhirhna khauh tak a siam chhunzawm zel duh loin khawpui hrang hrangah nawrh huaihawt a ni.

Nimin khan Beijing-a Tsinghua University zirlaite chuan an campus-ah rally huaihawtin, zalen taka awm an duh thu leh, lockdown puan titawp an phut thute an aupui.

Inrinni zan khan China rama khawpui lian ber, Shanghai khawpuiah nawrh huaihawt a ni bawk a, Nanjing-ah pawh university-ah lungawi lohna an lantir bawk a ni. Shanghai khawpuia pungkhawmte chuan China ram chhung zawng zawngah lockdown hlip vek turin sorkar an phut thu an sawi a, an zinga ṭhenkhat chuan rorellai Communist Party leh president Xi Jinping duh lohna thute an aupui bawk a ni.

An ram hmarthlanglam, Urumqi khawpuiah kar liam ta Zirptawni khan apartment-a kangmei chhuakah mi 10 an thi a, heng mite hi lockdown puan vangin an himna tura an tlanchhuah theih loh vanga thi nia sawiin, mipuiten thuneitute an demna thawm a nasa hle. Hei vang hian lockdown duh lohna hi an lantir thar leh a ni. Urumqi khuaah hian mi maktaduai 4 vel an cheng a, China rama lockdown kalpui reina ber ni mekin, khawpui chhung hmun ṭhenkhat chu ni 100 vel chu lockdown hnuaiah awm tawhin, ṭul bik thilah lo chuan chenna in chhuahsan khap an ni.

China ramah hian tun hnaiah Covid-19 hri kai hi an pung thar leh a, hetih lai hian thuneitute chuan ram chu hri kai awm lohnaa siam tumin khuahkhirhna khauh tak tak an siam zui leh nghal a ni. Inrinni liam ta khan China ram puma hri kai thar hi 40,000 dawn an awm a ni. Hri leng dona kawnga khuahkhirhna khauh tak a siam lai hian, China ramah Covid-19 vaccine la erawh chu ram dang nena khaikhinin an tlem hle thung.