Pakistan PM hlui Imran Khan rally-naah tel

Pakistan prime minister Imran Khan chu kar thum liam taa rally a neihna hmuna a ke-a kahhliam a nih hnua mipui hmuha a inlanna hmasa berah, Inrinni liam ta khan Ralwalpindi khawpuia rally neihnaah a inlan leh thei ta.

Imran Khan hian beih a nih chungchangah sorkar lama hotu pathum - prime miniter Shari, interior minister Rana Sanaullah leh ISI Counter Intelligence Wing hotu Maj-gen Faisar Naseer-te chu inrawlhah a puh a, nimina thu a sawiah pawh mi pathum-te chuan beih leh an la tum niin a sawi.

Kum 70 mi, Imran Khan chuan an party, Pakistan Tehreek-e-Insaf (PTI) chu an rama eirukna hluar chho mekah inhnamhnawih an tum lo a, assembly aṭang pawhin an bang vek dawn tih a sawi. "Chief minister leh party hruaitute chu assembly aṭanga bang vek turin thurawn ka pe dawn a ni," a ti. PTI hian Punjab leh Khyber-Pakhtunkhwa province bakah, Pakistan-occupied Kashmir leh Gilgit-Baltistan-ah sorkarna siam mekin, Sindh leh Balochistan assembly-ah member an nei bawk.

National Assembly-a PTI member-te chuan banna an thehlut tawh a, mahse an banna thehluh hi pawmsak an ni lo.

Imran Khan chuan inthlanpui buatsaih a nih hma chuan lungawi lohna lantir chhunzawm zel an tum tih a sawi. National Assembly term hi nakkum August-ah a tawp dawn chauh a, hei vang hian term tawp hma chuan inthlan hi buatsaih a nih a rinawm loh.