Taiwan President party hruaitu a nihna aṭangin a bang

28th November, 2022

Taiwan presidnet Tsai Ing-wen chu local election-ah an party-in hnehna a chan zawh loh avangin rorellai, Democratic Progressive Party (DPP) hruaitu a nihna aṭangin a bang.

President Tsai hian Inrinni zan khan party hruaitu a nihna aṭanga a ban thu hi sawiin, hemi rual hian inthlana an party thlawptute chungah lawmthu a sawi nghal bawk.

Mayor, county chief leh local councillor thlanah hian eptu party lian ber, Kuomintang (KMT) chu seat la hnem ber an ni.

KMT hian city mayor leh county chief seat 21 awmah, seat 13-ah hnehna an chang a, rorellai DPP hian seat nga chauh an la thung.

Tsai chuan an party headquarters-a chanchinthar lakhawmtute a kawmnaah, "Result hi kan beisei loh ang tak a ni. Hemi rual hian mipuite duhthlanna hi kan zahin kan pawm a ni," a ti. DPP hruaitu a nihna aṭangin bang mah se, Tsai hi kum 2024 thleng Taiwan President a la ni chhunzawm dawn tho a ni.