Netanyahu-a'n Noam party inremna ziahpui leh

Israel prime minister thar tur, Benjamin Netanyahu chuan ṭangrual sorkar thar siam turin hma a la zel a, Itama Ben-Gvir kaihhruai Otzma Yehudit party-te inremna a siampui hnuah, a pahnihna atan far-right Noam party-te inremna a ziahpui leh.

Noam party hi a hmaa inremna an lo siampui tawh, Otzma Yehudit party ang bawka langsar taka anpui kawp dodaltu a ni. Sorkar hmasaa LGBT-te hamṭhatna siamsak pawh ṭhiah leh duhtu a ni a, mahse Netanyahu chuan engmah hlauhthawn tur a awm loh thu a sawi thung.

Pathianni khan Netanyahu kaihhruai Likud party leh Avi Maoz kaihhruai Noam party chuan inremna an ziak a, an inremna siamah hian sorkar tharah Avi Maoz hi Prime Minister Office-ah deputy minister niin, agency siam thar 'National Jewish Identity Authority' a enkawl ang.

Maoz hian Soviet Union ram ni ṭhina Juda mite biak­pawh leh, Israel rama pem luh tir tuma hma la tu, governmental bureau Nativ a enkawl dawn bawk a ni. Moaz hi Juda chawisan duhtu leh Juda sakhaw dan thlawptu ruh tak a ni.

Likud party-in sorkar thar siam tura inremna a lo siampui tawh, Otzma Yehudit party hruaitu Itama Ben-Gvir chu national security minister-ah dah a ni ang.

Israel inthlanpui neih hnuhnung berah Netanyahu kaihhruai ṭangrual pawl chuan seat la hnem berin majority an nei pha a ni. President Isaac Herzog pawhin Netanyahu hi sorkar thar siam turin a ruat tawh a, December thla laihawl thleng hun an nei a ni. Hemi chhunga sorkar thar an siam thei lo a nih chuan President hian party dang hruaitu a sawm leh a ngai dawn a ni.