China-ah nawrh huaihawt chhunzawm zel ; Police-ten BBC journalist kut an thlak

China sorkarin Covid-19 hri leng venna tura khuahkhirhna khauh tak a siam duh loha mipuiten nawrh an huaihawt chu an chhunzawm zel a, nimin kha a zawna ni thum nawrh an huaihawtna a ni.

Khawpui lianahte nawrh hi huaihawt belh zel a ni a, Shanghai khawpuiah nawrh huaihawtte leh police-te innawr buaiin an zinga mi eng emaw zat chu police-ten an man a, pungkhawm turte danna atan kawngpuiah daidanna te an siam bawk.

BBC chuan Sanghai khawpuia nawrh huaihawt chungchang cover-tu, an journalist pakhat chu police-ten kut thlakin darkar eng emaw zat an hreng zui bawk niin a sawi. Hemi chungchanga BBC thuchhuah chuan, journalist Ed Lawrence hi police-ten an hren chhung hian an vuak bakah an pet bawk niin a tarlang. China foreign ministry chuan Lawrence hian journalist a nih thu engmah a sawilang lo niin a sawi ve thung.

Nimin zing khan Beijing khawpuia mi 1,000 vel chu Liangma River bul, Third Ring Road-ah an pungkhawm a, Covid test neih an duh loh thu te, zalenna an duh thute an aupui.

China ram pumah nimin khan Covid hri kai thar mi 40,052 an awm belh leh. Hri kai awm zat hi khawtlang rama hri len hluar laia hri kai zat nena khaikhin chuan an la tlem hle. Mahse China chuan Covid hri kai awm lohna ramah siam tuma hma an lak avangin, hri kai an pun chhoh leh hnuah khuahkhirhna khauh tak tak siamin, lockdown-te a puang leh a ni. Mipuite chuan hun rei tak kharkhip leh khuahkhirh an ni chu an ning tawh a, zalén duhin nawrh hi an huaihawt chho ta a ni.