Iran-a nawrh huaihawtah mi 300 chuang thi tawh
Iran rama September 16-a hijab hmang ṭha loa puha morality police-ten an man, Mahsa Amini thihna thleng avanga ram chhung hmun hrang hranga nawrh huaihawtnaah mi 300 chuang chu an thi tawh niin Revolution Guards hotu chuan a sawi.
Revolutionary Guards aerospace division hotu, brigadier general Amirali Hajizadeh chuan, "He nula thihna hian rampum mipuite a nghawng a ni. Lungawi lohna lantirna hrang hrangah mi 300 chuang an thi tawh a, an zingah hian naupangte pawh an tel," tiin a sawi. Nawrh huaihawtute an innawr buainaah police leh sipai eng emaw an thi tel tawh bawk.
Hetih lai hian Oslo-a hmunpui nei, Iran Human Rights chuan nawrh huaihawt zinga mi 451 leh security force 60 an thi tawh niin a tarlang ve thung.
Thuneitute chuan ram chhung hmun hrang hranga nawrh huaihawt chu media cover an phalsak lo a, sorkar hnuaia media lamin mipui thi zat hi a report mumal lo a, nawrh huaihawttute'n security force an beih dan a tarlan tam zawk avangin, nawrh huaihawt zinga thi zat dik tak hi hriatchian theih a ni lo.
General Hajizadeh chuan an rama buaina chhuak mekah Iran hmelma, a bikin khawthlang ramte leh Saudi Arabia an inrawlh nia sorkarin a lo puh tawhna chu a rawn sawinawn ve leh bawk.