Pakistan Taliban-ten sorkar nena inkahhai puan titawp

Pakistan Taliban, Tehreek-e-Taliban Pakistan (TTP) chuan sorkar nena tiamchin awm loa inkahhai an puan chu an titawp tih sawiin, an pawl mi leh sate chu che chhuak tura inpeih turin a hriattir nghal.

TTP leh Pakistan sorkar hian kumin June khan inkahhai puanna tur inremna hi an siam a ni.

Thawhṭanni khan TTP chuan thuchhuah siamin, "Hmun hrang hrangah sipaiten kan mi leh sate lakah beihpui an thlak chhunzawm reng a ni," tiin inremna an siam hi an tihtawp chhan an sawi.

An pawl mi leh sate tana thuchhuah an siamah, "Pakistan mipuite tan tiin dawhthei taka awm turin kan ti cheu a, inbiakna tihbuai zawnga che lo turin kan ti ṭhin che u. Mahse sipai leh intelligence agency-te chu an inbengdai ve lo a, min beih chhunzawm reng tho a ni. Hei vang hian keini pawhin ram chhung hmun hrang hrangah kan bei let ve leh tawh dawn a ni," tiin TTP chuan an tarlang.

Kar hnih liam taa Pakistan hmarthlang lama police paruk thattute an nih thu TTP hian an sawi bawk a, heng police-te hian an pawl hmunpui beih an tum vanga that an nih thu an sawi.