WHO-in Monkeypox hming 'Mpox' tiin a thlak

World Health Organisation (WHO) chuan Monkeypox hri chu a hming aṭangin a chhuanchhe lam hawia ngaihna a awm ṭhin avangin, 'Mpox' tia thlak a ni dawn tih a sawi.

Monkeypox hri hi kum 1958-a Denmark-a zirchianna neihah khan zawng aṭangin hmuh a ni a, hei vang hian a hming pawhin phuah a ni. A hnuah he hri hi ransa dangah, a bikin sazu-ahte hmuh zui a ni leh bawk.

Kumin May thla kha aṭang khan mihringah monkeypox hri vei hi an rawn pung chho a; he hri vei hmuhchhuah zinga a tam zawk hi mipa, mahni anpui kawp ṭhin an ni.

UN health agency chuan thuchhuah siamin, "Kumin kumtir lam aṭanga monkeypox hri a rawn darh chhoh khan, online lamah inthliarna leh a chhuanchhe zawnga sawina a nasa hle a ni," tiin mithiam hrang hrangte nena an inbiakrawn hnuah, WHO chuan monkeypox sawina atan hian 'Mpox' a hmang tawh dawn tih a tarlang. Kum khat chhung chu a hming pahnih hi a hmang kawp ang a, kum khat hnuah erawh 'monkeypox' tih chu paih a ni tawh ang.

Mihringa monkeypox hri vei hmuhchhuah hmasa ber chu kum 1970-ah Congo ramah hmuh a ni a, hemi hnu hian West leh Central Africa ramah mihringah a darh chho zui a ni. Kumin May thla aṭang khan ram hrang hrangah he hri hi a darh chho a, WHO-in a chhinchhiah danah ram 110-ah he hri vei hi mi 81,108 hmuhchhuah thar niin, mi 55 in an thihpui a ni. He hri vei hmuchhuah tam zualna ramte chu - United States (29,001), Brazil (9,905), Spain (7,405), France (4,107), Colombia (3,803), Britain (3,720), Germany (3,672), Peru (3,444), Mexico (3,292) leh Canada (1,449)-te an ni.

Monkeypox vei hmuhchhuah zinga 97% hi mipa niin, an kum chawhrual hi kum 34 a ni. Monkeypox vei hmuhchhuah zingah 85% chu mipa, mahni anpui sex hmanpui ṭhinte an ni.