UK-ah sakhaw nei lo nia inchhal an pung chak ; England leh Wales-ah Kristian 50% tling pha tawh lo

Office for National Statistics-in 2021 census report a tih­chhuahah, United Kingdom hnuaia England leh Wales ramah Kristian chu la tam ber mah se an tlahniam tawh hle. Heng ram pahnihah hian a ṭum khatna atan an official religion, Kristian sakhua zuitu nia inchhal chu 50% an tling pha tawh lo.

Census aṭanga a landanin, Britain ramah hian sakhaw nei lo an pung zel a, mingo an tlem zel.

England leh Wales-a cheng zinga 46.2%, mi maktaduai 27.5 chu Kristian niin an inchhal a, kum 10 liam taah kha chuan Kristian hi 59.3% an awm. Muslim an pung chak thung a, kum 10 liam taa 4.9% chu census thar berah hian 6.5% ni tawhin maktaduai 3.9 an awm tawh a ni. Hindu pawh 1.5% aṭangin 1.7%, maktduai 1-ah an pung bawk. Sikh sakhaw zuitu 5,24,000, Buddhist 2,73,00 leh Juda sakhaw zuitu 2,71,000 an awm bawk.

Hetih lai hian mi pathum zela mi pakhat, 37% chuan sakhaw zui nei lo niin an inchhal a, kum 2011 chhiarpui aiin 25% in an tam tawh zawk a, mi maktaduai 22.2 an tling tawh a ni.

UK hnuaia ram dang pahnih, Scotland leh Northern Ireland chuan census result hi a hrangin an siam thung.

Charity Humanists UK-a chief executive, Andrew Copson chuan UK-a sakhaw nei lo pung chak lutuk chuan an ram chu khawvela sakhaw ngaihsak lo ber ram zingah a siam tawh a ni, a ti.

England leh Wales-a census neihah hian mipui zinga 82% chu mingo an ni a, kum 2011 census-ah kha chuan mingo 86% an la awm. Asian 9%, Black 4% leh 'mixed or multiple' 3% an awm bawk.