Guangzhou-a nawrh huaihawt leh police-te innawrbuai

China ram chhim lama Guangzhou khawpui Covid khuahkhirhna dansiam duh lohna lantira nawrh huaihawtte leh police-te chu Thawhlehni zan khan a innawrbuai. Pungkhawmte hian police-te an hmanrua neih angten an vawm a ni.

Mipuite hian khawpui chhim lama Haizhu district-ah lungawi lohna hi lantirin,pungkhawmte hnawhdarh tuma kal police-te chu an hmanraw neih ang angin an lo bei let a ni. Police-te chuan an zinga mi 10 chuang an man.

China ram hmun hrang hranga mipuiten Covid khuahkhirhna siam leh lockdown puan duh lohna lantira nawrh an huaihawt chu police-te chuan an thunun thei tawh niin an sawi a, mahse hemi hnu Thawhlehni zan khan Guangzhou-a buaina hi a chhuak zui leh ta a ni.

Nawrh huaihawtna, Haizhu district-ah hian mi maktaduai 1.8 vel chengin, khawpui chhungah pawh hri kai an tam zualna a ni. District chhung hmun tam zawkah chuan October thla tawp lam aṭang khan lockdown puan a ni tawh. Tun thla tir lam khan Haizhu-ah hian lockdown puan duh lohna an lo lantir tawh bawk.