Pakistan-a bomb puakah mi 3 an thi

Pakistan Taliban, Tehreek-e-Taliban Pakistan (TTP) chuan sorkar nena inkahhai an puan an tihtawp thu an sawi hnu lawkah chhimthlang lama khawpui, Quetta-ah bomb tipuakin pawikhawihna an thlen nghal. Bomb puakah hian mi pathum an thi a, an zinga pakhat chu police officer a ni.

Quetta Police Deputy Inspector General (DIG) Ghulam Azfar Mahesar chuan Balochistan province khawpuia polio vaccina­tion campaign worker-te vengtu, security force-te chuanna motor chu bomb hian beih a nih thu a sawi. Mi pathum an thih bakah mi 24 velin hliam an tuar a, an zinga 20 chu police mi leh sa an ni. Bomb puak hian motor dang pahnih a tichhe tel bawk.

Prime minister Shehbaz Sharif chuan pawikhawihna thleng chu pawi a tih thu leh, thi chhungte a tawrhpui thu a sawi. "Polio worker-te chuan he hri tihbo tumin theihtawpin an thawk a, sorkar pawhin an hma lakna hi a ngai pawimawh hle a ni," a ti. Interior Minister Rana Sanaullah pawhin pawikhawihna thleng chu chhui nghal a nih thu leh, he thila inhnamhnawihte chu dan ang takin a chungthu ngaihtuahsak an nih tur thu a sawi.

TTP hian thuchhuah siamin, Quetta-a pawikhawihna thleng chu an pawl tih a nih thu an sawi a ni. An pawl hotu Omar Khalid Khorasan thihna phuba lak an tum thu leh, pawikhawihna pawh thlen zui zel an tum thu an tarlang. Khorasani hi August thla khan Afghanistan-a car bomb puakah a thi a ni.