China-in Covid khuahkhirhna a thlahdul dawn

China sorkarin Covid-19 hri leng vanga khuahkhirhna khauh tak a siam duh lohna lantira ram chhung hmun hrang hranga lungawi lohna lantir a nih hnuah, sorkar chuan khuahkhirhna a siam hi thlahdul chhoh a tum.

Ram chhunga hri kai thar zat hmuh chhuah hi la tam zel mah se, khawpui ṭhenkhat chuan lockdown an puante an hlip tawh a, mass testing neih tur tihte pawh tihtlem a ni tawh.

Health official-te chuan khuahkhirhna thlahdul chhoh a nih tur thu an sawi rualin, ram chhunga nawrh huaihawt chungchang erawh an sawilang tel lo. Hri leng mek hi a chak lo ve zel avangin khuahkhirhna hi thlahdul a ni dawn niin an sawi.

Khuahkhirhna thlahdul ṭhen tur zingah hian mass testing tihtlem te, nucleic acid test neih fo tura phutna te, mahni chenna ina postive case leh close contact inkhunghran, home quarantine phalna turte a tel. A hma chuan positive pakhat lek hmuh a nih pawhin a veng/bial pumten lockdown hi puan a ni ṭhin.

China ramah hian Covid hri kai thar hmuh chhuah hi pung chho mah se, khawthlang rama hri leng a hluar laia an hmuh chhuah zat a la thlau hle a, hri kai hmuh tawh zat pawh khawthlang ramte nena khaikhin chuan an la tlem a ni. Hetih lai hian ram dang zawng aiin khuahkhirhna a siam khauh zawk a, hun rei tak tak lockdown puangin, mipuite chu a khat tawkin mass testing an neih tir ṭhin a ni.