Indonesia-ah khuh damdawi vanga an laina chan ten zángnadawm-na phut

Indonesia-a chhungkua, khuh damdawi, cough syrup ṭha tawk lo an in avanga an chhungkhat laina hnai chan ta emaw taksa lama harsatna tawkte emaw chuan sorkar leh product supply-tute hnenah thubuai an thehlut.

Southeast Asian ramah hian August thla aṭang khan kal lam ṭha lo an pung chak hle a, mi 200 dawn an thi a, chung zinga a tam zawk chu naupang kum tling lo an ni. Hei vang hian chhuichian phutin heng damdawi hralhchhuah khapna hi an tichhuak zui bawk a ni.

Ministry of health, ram chhunga food and drug agency bakah industrial product siamchhuahna kawnga compound chi hnih uchuak taka hmangtu company pasarihte lakah hian thubuai an thehlut bawk.

Mitthi chhungte aiawha ding, Awan Puryadi chuan thuneituten damdawi hlauhawm tak hralhchhuah an khap loh avangin naupang zingah thihpui emaw enkawl ngai emaw an tam phah tih a sawi. "Tumahin mawhphurtu an nih thu an sawi lo. Tuna kan dinhmunah hian kan lungawi lo tlang hle a ni," tiin Puryadi chuan November 18-a thubuai thehluh chungchang chu nimin khan a sawi. "Damdawi supply-tu, pharmacy, BPOM (food and drug agency) leh health ministry-te chuan mawhphurhna an lak ngam vek kan beisei a ni," tiin heng chhungkuate hian mi pakhat thihna zelah rupiah tld 2 (USD 2,27,049) an phut a, enkawl ngaia awmte hnenah rupiah tld 1 (USD 63,524) an phut bawk a ni, tiin lawyer chuan a sawi.

Police chuan company pathumte lakah syrup damdawi an siamchhuah theihna licence chu an titawp lailawk sak tawh a ni.

Africa khawthlang ram, Gambia chuan an rama naupang 70 thihna chu ram pawn aṭanga syrup damdawi an lakluh avangin October khan a lo sawi tawh bawk. World Health Organization chuan India siam khuh damdawi an lakluh paliah diethylene glycol leh ethylene glycol-te chu phal chin aia tam an hmang a, heng thihnate nen hian inzawmna an neih ngei an rin thu a sawi.