Ukraine sipai 10,000-13,000 inkar an thi tawh

Russia leh Ukraine indona kal zelah Ukraine sipai 10,000 - 13,000 inkarin nunna an chan tawh tih Ukraine official chuan a sawi.

August thla tawp lam khan Ukraine sipai hotu chuan indonaah an sipai 9,000 dawn an thi tawh tih a sawi hnuah, Ukraine president Volodymyr Zelenskyy adviser Mykhailo Podolyak chu an sipai thi zat thar ber hi a rawn sawilang ve leh a ni.

"General staff aṭang leh thuneitu sang lam aṭangtea official taka thi zat kan dawn dan chu mi 10,000 aṭanga 13,000 vel an ni," tiin Podolyak chuan Thawhlehni khan a sawi. Ukraine sipai thi zat hi chiang taka puan a la ni lo a, Podolyak chuan a hunah tak President Zelenskyy chuan official data chu a rawn puang ang, a ti.

Thla hmasa khan, US-a top general-te chuan Ukraine nena an indonaah hian Russia sipai thi leh hliam 1,00,000 chuang an awm tawh thu sawiin, hetiang zat bawk hi Ukraine sipaite pawh an awm an rin thu an sawi.

Ukraine sipaite chuan September thla khan Russia sipaite beih let runpui thlakin, an ram hmarchhak leh chhim lamah ram zau tak an laklet theih phah a ni. Ral beihna atana hmun pawimawh, February 24 aṭanga Russia kuta awm tawh Kherson pawh an chhuhsak thei a ni. Thlasik khaw vawt zual zel karah, khawchhak lama Donetsk bialah sipaite hi an a la inbei chhunzawm reng a ni.

United States president Joe Biden leh France president Emmanuel Macron-te chuan Washington, DC-a inkawmna an neihah Ukraine chu chhawmdawl chhunzawm zel an tum thu leh, Russia-in a ram ṭhenawm laka tharum a thawhna chu an dem takzet tih an sawi.

Russia leh Ukraine hian an sipaite inrintawkna tihchhiat a nih loh nan an mi leh sa thi zat hi an thup ṭhen ve ve nia sawi a ni.

Indonaah hian Ukraine civil mi sang chuangte chu thah emaw ramtuilei loin emaw an awm tawh a, Russia-in Ukraine-a power station leh energy infrastructure a tihchhiat avangin boruak tihlumna, eng leh kawlphetha nei loin thlasik khaw vawt tak an hmachhawn chhoh a ngai dawn a ni.