Japan, SKorea leh US-in North Korea hrekna siam
Japan, South Korea leh United States chuan North Korea-in missile test a neih fo avangin weapon programme-a inhnamhnawih official-te hrekna a siam. NKorea-in ballistic missile a enchhin ṭhin chu Korea ram bial leh khawvel huap tan pawh thil hlauhawm tak a ni, an ti.
US Treasury department chuan NKorea official - Jon Il Ho, Yu Jin leh Kim Su Gil-te hrekna a siam thar a, heng mi pathumte hi April thla khan European Union chuan a lo hrek tawh a ni. US-in an thil neihte khawih chet theih loha hrensak an nih bakah, America mi chu hengmi pathumte dawr leh thawhpui khap an ni bawk.
South Korea foreign ministry pawhin mi pasarih hrekna siam tharin, an zingah NKorea nena inzawmna nei Singapore mi leh Taiwan mi pakhat ve ve an tel. Heng mite bakah company pariat a hrek tel bawk a ni.
Japan chuan company pathum leh mimal pakhat hrekna a tichhuak ve bawk.
United Nations-a NKorea hrek belhna siamtumna chu China leh Russia chuan an lo dansak tawh a, hei vang hian US chuan Japan leh SKorea bakah, Europe-a an thawhpui ram ṭhenkhatte nen NKorea laka hrekna siam dan hi a buaipui chho ta zawk a ni.