Khawsak hautakna ber Singapore leh New York

August leh September thla chhunga khawvela khawpui 172 zirchianna an neih aṭangin, New York leh Singapore chu khawpui khawsak hautakna ber an ni.

Khawpui 172-te hian nitin khawsakna tana mamawh 400 chuang man khaikhin a ni. Heng khawpuiah hian nikum aiin khawsakna man hi chawhrualin 8.1% in a sang tawh a, hei hi Ukraine-a indona thlengin a nghawng leh, China zero-Covid policy avanga supply-chain lam harsatna thlen te, interest rate sang leh exchange-rate inthlak nasa vangte niin Economist Intelligence Unit-a Worldwide Cost of Living report chuan a tarlang.

Nikum lama chenna hautak ber, Israel-a Tel Aviv khawpui chu kuminah pathumnaah a tla thla. Khawsak hautakna khawpui panga zingah hian Hong Kong leh Los Angeles an lang tel bawk.

Hetih lai hian Syria khawpui, Damascus leh Libya khawpui, Tripoli chu chenna atana hautak lo ber khawpui an ni thung.