Covid-19 vanga thi nuai 2.87 an tling tawh Russia-ah hri kai an pung chak
Khawvel pumah hripui leng mek, Covid-19 kai chu Thawhlehni thleng khan mi 42,71,688 an awm tawh a, he hri vanga thi hi mi 2,87,613 an tling tawh bawk.
Russia ramah hri kai an pung chak hle a, ni eng emaw zat chu ni khata hri kai hi 10,000 an chuang zel a ni. Thawhlehni khan hri kai thar hi 10,899 an awm leh a, hri kai tamna ram pathumna a ni pha tawh. Sorkar chuan hri kai hriat an pun chakna chhan hi test an neih tam vang niin a sawi a, mi maktaduai 5.8 chuang Covid-19 test neih sak an ni tawh a ni, a ti.
US chu hri kai leh hri vanga thi tamna ber ram a la ni chhunzawm zel. US-a coronavirus kai awm zat hi 13,85,834 tling tawhin, mi 81,795 in an thihpui tawh a ni.
Philippines khawpuiah
lockdown pawtsei
Covid-19 vangin Philippines khawpui Manila-a inkharkhip (lockdown) kalpui mek chu pawhsei a ni a, kar 11 (ni 80) chhung atan inkharkhip hi hman chhunzawm a ni dawn.
Philippines-ah hian January 30 khan Covid-19 kai an awm tih hriatchhuah a ni a, March thla tawp lam aṭang khan hri kai hi an pung chho a ni. Ramchhunga hri kai an pun belh loh nan March ni 15 khan Philippines president Rodrigo Duterte chuan an ram hmun ṭhenkhata hman tur inkharkhipna chu a puang zui a ni.
An ram khawpui Manila-ah hian hri kai hi an tam ber a, Philippines-a hri kai zawng zawng hmun thuma ṭhena hmun hnih chu Manila aṭangin a ni. He hri vanga thi zinga 72% pawh Manila khawpuia mi an ni bawk.
Philippines-ah hian hri kai zawng zawng hi mi 11,350 an awm a, heng zinga mi 2,106-te chu enkawl dam tawh niin, he hri vanga thi hi mi 751 an awm tawh a ni.
China mask supplyṭhat tawk loh vangin Canada PM-in a man pek a tum lo
Canada prime minister Justin Trudeau chuan China aṭanga medical mask an lakluh, maktaduai riat dawn chu a ṭhat tawk loh avangin a man an pe dawn lo tih a sawi.
China aṭang hian N95 mask hi Canada hian maktaduai 11 a lalut a, mahse heng zinga maktaduai khat chauh chu Canadian standard tling an awm a, maktaduai 1.6 chu enfiah mek an la ni bawk.
PM Trudeau chuan frontline worker-te tana hman tlak lo mask man chu sorkarin a pe dawn lo tih a sawi. Hei hian Canada leh China inkar boruak a tichhiat zual phah rin a ni.
Kum 2018 kum tawp lama Vancouver thuneituten Chinese company Huawei senior executive Meng Wanzhou an man hnu leh, a thungrulhna atana China-in an ram Canada palai pahnih a man avangin an ram pahnihte inkar boruak hi a ṭha vak lo sa a ni.