Wuhan khawpuia cheng mi mtd 11 te Covid-29 test neihpui vek tum

Khawvela hripui leng mek rawn chhuah ṭanna, China-a Wuhan khawpuia cheng mi maktaduai 11-te chu Covid-19 test neihpui vek tum a ni tih state media report chuan a tarlang. 

Wuhan khawpuiah hian hri leng hi a reh ta nia ngaiin khawpui chhunga inkharkhipna leh khuahkhirhna kar 11 chhung kalpui a nih hnuah, April 9 aṭang khan thlahdul ṭan a ni. 

April 3 aṭang khan hri kai thar an awm tawh loh hnuah, kar liam ta kartawp lam khan hri kai thar hi paruk hmuh thar leh a ni. 

Khawpui chhung nunphung pawh a pangngai chho ṭan dawn a, school leh sumdawnna hmunte hawn niin, public transport-te pawh an service leh ṭan tawh bawk. Mahse hri kai hmuh thar an nih leh tak avangin, ruahmanna thar hi siam a ni leh ta a ni. 

Wuhan khawpui chhunga district tinte chu 10-day testing plan siam tura hriattir an ni a, test neihna turah hian kum upa lam leh mihring chen bitna hmuna mite chu dah hmasa tura tih an ni bawk. 

Hetih lai hian health official-te chuan khawpuia chengte an vaia test neih tir chu a hautak dawn hle niin an sawi a, medical worker bakah hri kai nena inhnaihvai leh a hri darh hlauhawm zualna hmuna mite chauh test rih turin an rawt.