White House-a hnathawkte mask vuah vek turin ti

US president chenna White House-a hnathawk mi pahnihin Covid-19 an kai tih hriatchhuah a nih avangin, he hmuna hnathawkte chu hmai tuamna (mask) vuah vek tura tih an ni.

White House personnel office chuan White House-a thawk zawng zawng chu an hnathawhna hmuna mask vuah vek turin a hriattir a, White House-a hri kai hmuhchhuah an awm avang hian president Donald Trump chuan nitin hri a kai nge kai lo tih test a nih ziah dawn thu a lo sawi tawh bawk.

Kar liam ta Zirtawpni khan vice president Mike Pence-a press secretary, Katie Miller chuan Covid-19 a kai tih hriat a ni a, ani bakah hian US Navy zinga Trump hnungzuitu pakhatin a kai tih hriat chhuah bawk a ni.  

Hri leng hi White House-a hnathawkte zingah kai an awm tih hriat chhuah ni tawh mah se, Trump chuan US inrelbawlna chu a tlukchhiat phah dawn loh thu leh an dinhmun tawh mek chu thunun a nih thu a sawi. 

Trump chuan US-a hri kai zawn chhuah zel a nih theih nan a test-na tur neih tam a ngaih thu sawiin, hemi atan hian pawisa pawh sorkarin a tum belh dawn a ni, a ti. A duh apiangten test an neih theih nan, tun thla chhung hian sorkar chuan US dollar vaibelchhe 11 chu state-te hnenah a pe dawn a, state-te hnenah hian tun thla chhunga test an neih theih zat emaw bituk tur hi sorkar chuan a zawt ang.