Iran-in Israel spy agency thawhpuia puh mi 4 khaihlum

Iran sorkar chuan an hmelma, Israel spy agency Mossad thawhpuia puh mi pali chu nimin khan a khaihlum a, mi dang pathum chu kum 5-10 tang turin a hrem bawk.

Judiciary official news website-in a tarlan danin, nimin zinga mi pali khai­hlumte hi Hossein Ordoukhanzadeh, Shahin Imani Mahmoudabad, Milad Ashrafi Atbatan, leh Manouchehr Shahbandi Bojandi-te an ni.

Heng mi palite hi Iran sorkar leh vantlang thil beih leh tihchhiatnaah leh mi rukbonaah te inhnam­hnawhin, Sweden-a inkhuar, Mossad mi leh sa hnen aṭangin an chet dan tur hi an dawng ṭhin niin judiciary chuan a tarlang. An pali hian a hma pawhin pawikhawihna hrang hranga inhnamhnawihna lo nei tawh an ni, a ti bawk.

Mi dang pathum pawh mi rukbona kawnga puitu leh dan loa ralthuam kawlruk vangin kum 5-10 tang turin hrem an ni bawk a ni.

Iran state media, Tasnim news agency chuan kar liam ta Nilaini khan Supreme Court chuan Zionist sorkar an thawhpui avanga kumin June thlaa man, heng mi palite hi thi tura hremna pek chu a nemnghet a, nimin zing khan khaihlum a ni ta tih a sawi.

Iran hian Israel bakah, US leh Europe ram thawhpuitua puhin an mi leh sate a lo man fo tawh a ni.

Hijab dan hmang ṭha loa police-ten an man, Mahsa Amini thih dan chungchang avangin September thla laihawl aṭang khan Iran ram chhung hmun hrang hrangah sorkar lakah lungawi lohna lantir a ni a, hetih lai hian Iran sorkar chuan tualchhung buaina thleng mekah US, Israel, UK, France, Germany leh Saudi Arabia-te chu inrawlhah a puh bawk.