Myanmar sipai sorkarin zirlai 7 thi tura hremna pe

Myanmar sipai sorkar chuan Yangon-a zirlai pasarih chu sipai rorelna duh loh leh dodalna lantirnaa an tel vangin thi turin hremna a pe.

The Irrawaddy-in a tarlan danin, zirlai hremte hi Dagon university zirlai vek - Khant Zin Win, Thura Maung Maung, Zaw Lin Naing, Thiha Htet Zaw, Hein Htet, Thet Paing Oo, leh Khant Linn Maung Maung-te an ni a, Isein Prison-ah an tang mek a ni.

Dagon University Students' Union chuan zirlai pasarihte hi sipai officer hlui, Saw Moe Win thahnaa inhnamhnawiha puhin April thla khan man an ni tih a sawi. Eng ang thubuai tak nge siamsak an nih erawh hriat a ni lo a, kar liam ta khan Insein Prison-a military tribunal-ah an chungthu hi ngaihtuahin hremna hi pek an ni.

Zirlai pawl chuan an zirlai puite hremna pek hi sipai sorkarin phuba a lak tumna a ni tiin, he thil thleng hian ram chhunga courtroom leh legal system dik tawk lohzia leh a tlukchhiatzia a lantir an ni, an ti.

Assistance Association for Political Prisoners (AAPP) in a tarlan danin, nikum February 1-a sipaiten thuneihna an chelh aṭangin, sipai sorkar dodaltu zinga mi 132 chu thi tura hremna pek an ni tawh. Heng zinga 90 chu tan-ina tang lai an ni. An zinga tam zawk hi university zirlai, doctor leh ṭhalai mi thiamte an nih thu a sawi.