Trump-an Jerusalem-a US embassy sawn a tum

US President Donald Trump chuan Israel-a US embassy, Tel Aviv ami chu Jerusalem khawpuia sawnna turin hma a la ṭan a, embassy sawnna tura hma lak dan ṭha ber tur ngaihtuah turin thupek pawh a tichhuak tawh niin official-te chuan an sawi.

Tel Aviv aṭanga Jerusalem-a US embassy sawn anih chuan Arab ramte an lungawi loh hle rin a ni a, Palestinian chuan state hran a nih hunah East Jerusalem chu a ram khawpui atana hman a tum avangin Israel leh Palestinian inkara inremna siam tuma hmalakna thleng pawhin a nghawng theih rin a ni.

White House chuan high-level meeting koin, Jerusalem-a embassy sawn dan tur hi an sawi ho a, hun tiam chin siam dan tur pawh an ngaihtuah nghal bawk. He meeting-ah hian President Trump chuan a ruahmanna siam dante pawh a sawichhuak a, embassy sawn hun tur tihkhawtlai ṭha a tih loh thu a sawilang nia sawi a ni bawk.

President hlui Bill Clinton-a hnuaia Jerusalem Embassy of 1995 siamah khan, Israel-a embassy hi an ram khawpui Tel Aviv-ah dah chhunzawm a nih zel theih nan thla ruk danah president chuan Congress-ah a nemnghet zel tur a ni a, Clinton-a hnua president lo ni tawhte chuan hei hi an ti ziah a ni.

Hetih lai hian President Trump hian nikum-a inthlan dawna a campaign-naah embassy hi Israel-a sawn alo tiam tawh a ni.