NKorea missile-in Washington kap pha

North Korea-in Nilainia ballistic missile a enchhin chu a missile enchhin tawh zinga la chak ber niin, US khawpui Washington pawh a kap pha dawn nia sawi a ni.

Nilaini-a missile a enchhin hi two-stage liquid fuel niin, km 13,000 chin kap pha tura ngaih a ni a, hei hian Washington a huam pha niin South Korea Defence Ministry chuan nimin khan a sawi. Hei bakah hian he missile hi tun hnaia a lo enchhin tawh, ICBM Hwasong-14 aiin a lian zawk a, nuclear ralthuam pawh phur thei a ni tih a sawi bawk.

NKorea chuan Nilaini-a a missile enchhin hi km 4,475-a sangah thlawkin, km 950-a thui a thlawh hnuah Japan bul tuipuiah a tla niin a sawi. He missile hi Pyongyang bul aṭanga kahchhuah a nih thu a tarlang bawk.

South Korea President Moon Jae-in chuan Ningani zan khan US President Donald Trump chu telephone-a biain, NKorea chetdan chungchang hi a sawipui nghal a ni. Hruaitu pahnihte hian thawhdunna tichak a, NKorea chu a nuclear program titawp tura chak zawka nawr leh hrekna siam chungchangte an sawidun a ni.