Russia-in US ngenna hnawl

Russia chuan US-in NKorth Korea nena an inzawmna titawp tura a ngenna chu a hnawl.

US chuan NKorea hian UNSC resolution dodal zawnga missile a enchhin chhunzawm luih zel avangin hrekna hrang hrang a lo siam tawh a, NKorea ram ṭhianṭha Russia pawh NKorea nena an inzawmna titawp turin a lo ngen tawh a ni.

Russia chuan US ngenna hi a hnawl thu sawiin, US chuan NKorea hruaitu Kim Jong-Un tihchhiat vek tumin a theih ang angin hma a la a ni, a ti. Russia Foreign Minister Sergei Lavrov chuan US-in an ram laka ngenna a siam leh, NKorea hrekna thar a siam chu sawiselin, a thiltihdan hi ṭha an tih loh thu a sawi.

Lavrov chuan US chu Kim Jong-un-a kaihhruai sorkar chu cho thinur tumah puhin, US chu NKorea ram tihchhiat vek tuma phiarruah a ngaih thu a sawi bawk. US in South Korea-a air force drill pui tham tak buatsaih a tum pawh sawiselin, he thil hi NKorea sorkar elsenna tur nia a ngaih thu a sawi a, hei ai chuan boruak siamṭha tura inbiakna neihpui a ṭhat zawk tur thu a sawi a ni.

"America chuan engnge a tum tak a sawifiah a ngai a ni. NKorea tihchhiat vek an tum a nih chuan, tlang takin sawi mah se, an ram hruaitu pawh hian he thu hi nemnghet mai rawh se" tiin Lavrov chuan a sawi.

US President Donald Trump chuan Kim Jong-UN chu 'uite damlo' tia sawiin, hrekna thar siamah a lo vau tawh a ni. UN-a US ambassador Nikki Haley pawhin NKorea vanga indona a chhuak a nih chuan NKorea chu tihchhiat vek a nih tur thu a lo sawi tawh bawk.