UNICEF-in Afghanisan-a chhungkaw retheite pawisa faiin ṭanpui dawn

United Nations Children's Emergency Fund (UNICEF) chuan Afghanistan-a mi rethei chhungkaw nuai khatte chu thlasik khawvawt an tuar chhuah theihna atan pawisa faiin a ṭanpui dawn tih a sawi.

Mi retheite ṭanpuina atana pawisa fai an pek turah UNICEF hi Foreign, Commonwealth & Development Office UK, Swedish International Deve­lopment Cooperation Agency (SIDA) leh German Foreign Office-ten an pui dawn niin Afghanistan news agency, Khaama Press chuan a tarlang.

Khaama Press-in Inter­national Committee for the Red Cross (ICRC) report a tarlan chhawn danin, Afgha­nistan ramah hian ei leh in khawpkham nei zo lo makta­duai 20 chuang an awm.

World Health Organisation (WHO) pawhin naupang, an taksa mamawh ang chaw ṭha ei phak lo 34,000 chu damdawiin-ah enkawl an ni tawh a, mi maktaduai 19 vel ei tur khawpkham nei loin an awm mek tih a lo sawi tawh bawk. Kum thar lamah chuan chhawmdawl ngai hi mi maktaduai 28.3 velah an pung chho dawn niin a sawi a, chhawmdawl ngai zingah naupang awm zat hi an pung zel a ni, a ti.

United Nations High Commissioner for Refugees (UNHCR) chuan Afghanistan rama mi rethei maktaduai 4.6 vel chu pawisa faia ṭanpuina hi a lo pe tawh bawk a ni.

India chuan kumin chhungin Afghanistan-a mi harsa­te ṭanpuina turin wheat, ton 25,000 chu kumin February thla khan Pakistan kaltlangin a thawn lut a, March 3-ah wheat ton 2,000 leh March 8-ah truck 40 hmangin wheat ton 2,000 a thawnlut tawh bawk.

Afghanistan ministry of economy chuan an rama rethei an punna chhan ber chu a zawna kum thum chhung khawkheng an tawrh vang te, climate change leh bank lamin khuahkhirhna an siam vangte niin a sawi.