Bahrain ramah Israel President a zin
Israel president Isaac Herzog chu ni hnih cham turin Pathianni khan Bahrain ramah a zin a, Bahrain lal, King Hamad bin Isa Al Khalifa leh Crown Prince Salman bin Hamad Al Khalifa-te meeting a neihpui nghal.
Kum 2020 khan Israel leh Bahrain hian an inlaichinna siamṭhain, palai pawh an intir tawn leh tawh a ni. Nikum September thla khan Israel prime minister kalchhuak tur, Yair Lapid chuan Bahrain hi tlawhin Israel embassy a hawng a ni.
Ram pahnih hruaitute hian regional security chungchangte an sawi bakah, private sector-te thawhho dan turte pawh an sawi tel a ni. Herzog hi an rama industry leh business aiawhten an zui.
Kum hnih liam ta khan Bahrain bakah Arab ram zingah UAE leh Morroco chuan US president hlui Donald Trump hmalakna hnuaiah Israel nena an laichinna hi an lo siamṭha tawh a ni. Israel hian kum 1979 leh 1994 khan Egypt leh Jordan ram chu thawhpui turin inremna a lo siampui tawh bawk.