Pakistan inthlanah Dawah (JuD) hotuin chuh a tum

Pakistan firfiakten Mumbai khawpui an beihnaa a ruahmantu ber, Pakistan firfiak pawl Jammat-ud-Dawah (JuD) hotu Hafiz Saee chuan nakkuma Pakistan ram inthlanpui neih turah, Milli Muslim League (MML) hminga chuh a tum tih a sawi.

Kumin January thla aṭanga house arrest-a hren, Saeed hi November 24 khan chhuah zalen a ni.

JuD headquarters, Chauburji-a chanchinbu mite a kawmnaah Saeed chuan 2018 inthlanpui chu MML hminga chuh an tum thu a sawi a, kum 2018 hi zalenna suala beitu Kashmir mite tan a hlan tih a sawi. Saeed chuan MML hminga inthlan chuh an tum thu sawi mah se, MML hi election commission hnuaiah a la in register lo. JuD hian Lahore-a Saeed-a hren a nih laiin MML hi an din a ni. Saeed chuan Kashmir mite chuan eng dinhmun pawh tawk se a thlawp zel dawn tih a sawi a, hei hi India pawhin hria se a duh thu a sawi. India chuan Kashmir chungchangah aw chhuah tawh lo turin a duh a, Pakistan sorkar pawh a nawr nasa niin a sawi. Mahse Kashmir mite tan a beih zel tur thu a sawi.

Kum 2008 November thlaa Mumbai khawpui beihna a mi 166 thihnaah Saeed hi a mawhphurtu bera puh a ni a, hemi kum December thla khan United Nations chuan UN Security Council Resolution 1267 hnuaiah terrorism black list-ah a telh a, US pawhin man a nih theih nan a awmna chin hrilh thei hnenah US dollar maktaduai 10 lawmman pek a tiam bawk.