Indonesia Parliament-in Uire khap leh hremna dan a pass

Indonesia Parliament chuan hun rei tak an buaipui tawh, criminal code thar siamin, uire khapna leh hremna pek theihna dan chu Thawhlehni khan a pass ta. He dan hi an ram mipuite leh an ram tlawhtu ramdang mite lakah ang khat veka kenkawh a ni ang.

Deputy minister of law and human rights, Edward Hiariej chuan criminal code thar chu President-in a hming a ziah hnan leh phawt a ngai tih sawiin, hman nghal a ni mai rih dawn lo tih a sawi. "He dan tharah hian kaihhruaina siamṭhat tur eng emaw zat a awm a, kum khat velah tihfel hman theih a ni ang," a ti. Dan hluite thlak fel a, dan thar hmang tur hian kum thum vel a ngaih rin a ni.

Parliament-in a pawm, criminal code siamṭhatah hian uire chu pawisa chawitir leh kum khat jail-a tantir theih an ni dawn a, innei siloa in khatah cheng dun chu pawisa chawitir leh thla ruk chhung tantir theih an ni bawk ang. Mahse uire chungchangah hian an nupui/pasal emaw, nu leh pa emaw faten emaw complaint an thehluh a, police report siam hnuah uire thubuai hi siamsak chauh an ni ang.

Nau tihtlak chu pawikhawina lian thamah ngaih a ni bawk a, mahse nu nunna atana hlauhthawnawm leh, pawngsual tawk vanga nau paite chu an naupaiin thla 12 a la tlin loh chuan ngaihnathiam an ni dawn thung.

Dan siamṭhat hnuaiah hian President leh state institution chungchang zahpah lo taka sawi khap a ni bawk.