NKorea-in K-drama entu tleirawl pathum tihlum

North Korea chuan South Korea film en a, midangte hnena semtu, high school zirlai tleirawl pathum a tihhlum nia sawi a ni. Firing squad-in an kahhlumte hi mipa vek niin, kum 16 leh 17-te an ni.

SKorea chanchinbu, Chosun Ilbo chuan hemi chungchang hi report in, kumin October thla tir lama thleng a ni a, mahse kar liam ta khan tihhlum an nih thu hi a darh chauh niin a tarlang.

Kum 2020, December khan North Korea hian dan thar pass in, an ṭhenawm South Korea siam, audiovisual content neih leh en chu pawikhawihnaah a telh a ni. He dan hmang hian kum tling lote hrem tel an ni ngai lo a, mahse tunah chuan kum tling lo pawh a huam tel tir vek tawh a ni.

Dan khauh tak siam ni mah se, NKorea zingah SKorea film en ṭhin hi an tam hle nia sawi a ni. Unification Media Group-in survey a neihah, zawhna chhangtu zinga 96% chuan K-drama, a bikin 'Squid Game' leh 'Crash Landing on You' chu an en ṭhin thu an sawi.

NKorea hian nikum khan K-pop music video entu mi pasarih a lo tihlum tawh bawk. NKorea ram hotu lu ber, Kim Jong-un chuan K-pop music chu 'cancer hlauhawm' tak ang niin a lo sawi tawh a ni.