Wuhan lab-a scientist hluiin Covid chu mihring siamchawp a ni tih a sawi

Covid-19 hri hmuh chhuah ṭanna, China rama Wuhan khawpuia research laboratory-a thawk ṭhin, US-based scientist Andrew Huff chuan Covid-19 chu mihring siam chawp, laboratory aṭanga put chhuak niin a sawi.

Andrew Huff hian a lehkhabu thar, 'The Truth About Wuhan' tihah khawvel pum a buai phahna chhan, Covid hripui leng chu US sorkarin sum hmanga a puih, China-a experiment neihna aṭanga chhuak niin a sawi.

Huff chuan kum hnih liam ta khan Covid hi Wuhan Institute of Virology (WIV) aṭangin a putchhuak niin a sawi. Experiment tihna lab-ah hian security a ṭha tawk lo a ni, a ti.

Covid hripui a rawn len ṭan aṭang khan he hri lo chhuahna chungchangah inhnialna tam tak a awm a, Wuhan lab aṭanga chhuak nia puhtu pawh tam tak an awm. Mahse China official leh lab worker-te chuan he puhna hi an pha nasa hle thung.

Andrew Huff hi New York-a non-profit orga­nisation, EcoHealth Alliance vice president hlui a ni bawk a, hri leng inkaidarh thei chungchang hi an zirchiang ṭhin. Kum tam tak chhung chu US sorkar hnuaia National Institute of Health (NIH) aṭanga an sum dawn hmangin, bak aṭanga hri darh theite an zirchiang a, Wuhan lab nen pawh thawhdunna ṭha tak an nei a ni.