Argentina submarine-a thawk chhungte lungawi lo

Argentina sorkarin November 27 aṭanga chin hriat loha awm, tuihnuailawng-a chuangte zawn hna a thawh chu a tihtawp a, hei vang hian he lawnga chuang chhungte an lungawi lo hle a, Pathianni khan lungawi lohna lantirin kawng an zawh.

Lawng chawlh hmun, Mar del Plata-ah submarine-a chuang chhungte chuan kawng zawhin, sorkar chu chhanchhuah hna thawk chhunzawm turin an phut a, sorkarin beihpui a thlak a titawp mai chu an dem thu an sawi. President Maurico Marci chu biak an phut thu an sawi bawk.

Argentina navy-te chuan lawnga thawkte nungdama hmuh beiseina a bo tawh tih sawiin, chhanchhuah hna an thawh hi an lo titawp tawh a ni. Navy-te chuan tuihnuailawng hi biak theih loha a awm hnu lawkah a awmna bul nia hriatah thil puak ri hriat a nih thu an sawi a, mahse tun thlengin lawng chhia emaw, a thawktute emaw hi hmuh an la ni lo.