Pakistan-ah United State Defence Secretary zin

US Defence Secretary James Mattis chu nimin khan Pakistan-ah a zin a, sorkar leh sipai hruaitute a kawm ang.

James Mattis hian Defence Secretary a nih anga Pakistan a tlawh ṭum khatna a ni a, a zinchhuah hma hian US chuan Pakistan chu a ram chhunga zalen taka firfiakte an awm theih lohna tura hma la ngei turin a duh tih a sawi a ni.

Kumin August thlaa US President Donald Trump-an south Asia policy thar a puan khan, Pakistan chu tualchhung indona thlenna, Afghanistan-a Taliban firfiakte thlawpah a puh avangin ram pahnihte inkar boruak pawh a ṭhat loh pha hle a ni. Official-te chuan ram pahnih inkar boruak chhia siamṭhatna tur leh, Taliban firfiakte beihletna kawnga thawhdunna ṭha siam dan kawng zawng turin Pakistan hi a tlawh nia sawi a ni.

Pakistan security force-te chuan firfiakten an rukbo, Canada mi leh a nupui America mi an chhanchhuah hnuah US leh Pakistan inkar boruak pawh hi a ṭha leh deuh tawh a ni. Trump leh US official-te chuan firfiakte beihletna kawngah thawhhona ṭha zawk an neih chhoh zel an beisei thu an sawi.